На рэспублiканскiм конкурсе сярод аператараў па штучным асемяненні буйной рагатай жывёлы Вольга Біёнчык заняла II месца, Аляксандр Лавышык — III

14 лістапада, Узда /Уласн. інф./. Удзельнікамі рэспубліканскага конкурсу прафмайстэрства сярод аператараў па штучным асемяненні жывёлы, што прайшоў на Гомельшчыне, былі і нашы землякі — Вольга БІЁНЧЫК з акцыянернага таварыства “Уздзенскі” і Аляксандр ЛАВЫШЫК з агракомплексу “Белая Русь”. 
Імёны гэтых людзей у раёне на слыху — неаднаразова і Вольга Генадзьеўна і Аляксандр Паўлавіч прызнаваліся найлепшымі ў сваёй прафесіі, атрымлівалі заахвочванні рознага ўзроўню. Вольга Біёнчык у жывёлагадоўлі шэсць гадоў, Аляксандр Лавышык — больш як дваццаць. Аднак вопыту не пазычаць абаім. Свае веды уздзенскія канкурсанты пацвердзілі і на конкурсе: сярод аператараў па штучным асемяненні буйной рагатай жывёлы Вольга Біёнчык заняла другое месца, Аляксандр Лавышык —трэцяе месца сярод аператараў па штучным асемяненні свіней. 
І калі для Вольгі Генадзьеўны конкурс падобнага ўзроўню другі па ліку (летась таксама стала яго сярэбраным прызёрам), дык для Аляксандра Паўлавіча  (дарэчы, самага сталага ўдзельніка конкурсу — яму 62 гады) гэта быў першы такі сур’ёзны прафэкзамен.  
—— Гэты конкурс стаў для абаіх добрым штуршком, каб у тэорыі і на практыцы пацвердзіць свае навыкі па ўзнаўленні статка. На пытанні, якія суправаджалі кожнае конкурснае заданне, яны адказвалі правільна, грунтоўна. Лічу, нашы спецыялісты дастойна прадставілі на конкурсе не толькі наш раён, але і Мінскую вобласць, — зазначыла начальнік райплемстанцыі Наталля Ляневіч, якая першай падзяліла з імі радасць перамогі. Далей былі віншаванні ад родных і калег. 

Вера ЛУКАШЭВІЧ, Сяргей ШАРАЙ (фота) 
Чырвоная зорка